Vawiin Ni 7.9.2026 (Thawhtanni) hian Mizoram Sawrkar leh Bank pariat te chuan State chhunga ‘One Department, One Bank’ (ODOB) hmalakna kalpui turin inremna an ziak. He inremna hi CM Conference Hall-ah Chief Minister Pu Lalduhoma leh Chief Minister Adviser (Finance & Planning), Pu TBC Lalvenchhunga te telpuina hnuaiah ziah a ni a. Mizoram Sorkar aiawhin Pu Vanlaldina Fanai, Commissioner & Secretary, Finance Department chuan he inremna hi a ziak a, a tel bank hrang hrang aiawh phalna nei ten Bank aiawhin hming an ziak bawk.

He hunah hian, Chief Minister chuan, Comptroller and Auditor General of India (CAG) Audit Report-ah Finance Department hriat loha Drawing and Disbursing Officer (DDO) account-a sorkar sum tam tak dah a nih thu vawi tam tak a tarlang a ni, a ti. “Hetiang sum chungchanga Finance Department-in information a zawn hian duh angin thu hriat tur tling tawk a hmu zo lo thin a, hetiang harsatna hi sutkian a nih theih nan leh sorkar sum enkawl dan tha zawka kalpui a nih theih nan ‘One Department, One Bank’ system kalpui kan rel a ni,” tiin Chief Minister chuan a sawi.

He hmalakna hian a tirah chuan department pariat a huam dawn tih sawiin, a tul angin department dang pawh he system hnuaiah hian luhchilh chhoh zel a nih tur thu a sawi bawk. “Hei hi vantlang sum leh pai enkawlna kawnga hmalakna thar a ni a, langtlang zawkna a thlen ang a, Sawrkar hian a sum leh pai te a vil leh enkawl dan tur a pui dawn a ni. He hmalakna kawnga min thawhpui tura hma latu bank-te chungah lawmthu kan sawi a ni,” a ti.

Chief Minister chuan Mizoram-in Credit-Deposit (CD) Ratio a hniam lutuk chu a tarlang bawk a, State chu ram pum average hnuaiah a awm chhunzawm zel tih a sawi bawk. Hmarchhak bialah chuan kum 2025-26 chhunga CD Ratio chu Assam-ah 73.52%, Nagaland-ah 61.1% leh Tripura-ah 61% a ni a, Mizoramah 55.83% a ni thung. Sawrkar chuan kum 2028-29-ah Mizoram CD Ratio chu 67% tal tihsan a tum thu sawiin, State chhunga bank hnathawkte chu a tum tihhlawhtlinna kawngah theihtawp chhuah turin a chah.

‘One Department, One Bank’ hmalakna hnuaia Sawrkar nena thawhhona nei bank pariat te chu:

State Bank of India
Mizoram Cooperative Apex Bank
Mizoram Thingtlang Ban
Axis Bank
HDFC Bank
ICICI Bank
Union Bank of India
Indian Overseas Bank te an ni.