Vawiin khan Mizoram Cooperative Apex Bank Ltd. (MCAB ltd.) chuan General Assembly vawi-31 na leh Scheduled Bank-ah hlankai an nih lawmna chu Vanapa Hall-ah hmangin,Cooperation Dept. Minister Pu P.C Vanlalruata chu khuallian niin, Pu John LT Sanga, Registrar of Cooperative Societies, Cooperation Dept. chu khualzahawm a ni.

Khuallian chuan thu sawiin, inkhawmpui hmang tura lo kal zawng zawng te chungah lawmthu a sawi a. Scheduled Bank dinhmun sang taka hlan kai a nih chu Mizoram Cooperative Apex Bank Ltd. tan mai ni lovin Mizo mipuite tana mellung pawimawh tak a nih thu a sawi. Mizoram Cooperative Development Council din a nih thu leh Cooperative movement chak zawka kal tum a nih thu a sawi lang bawk a ni. Mizoram chuan hmasawnna kawng hrang hrang hmu zelin- ei leh bar kawngah te, intodelhna kawngah te, kuthnathawktute chawikanna kawngah te, hemi kawngah hian cooperative movement chuan hmun pawimawh tak a chang tih a sawi bawk a ni.

Mizoram economy leh a mi chengte tana a tha zawnga danglamna thlentir thei ruahmanna sawrkarin a siamte, a tak ram chantir turin cooperative society-te an pawimawh tih a sawi. Mizoram chu tlangram a nih avang te, a ram leilung that tawklohna avang tein mi ram leh state dangtein an siamchhuah theih leh an tharchhuah theih ang te chu bawhzui harsa mah se, kan ram leilung mil ang zela insiamrem thiamna neiin, kan ram chhung hausakna te kan chhawr thiam chuan Mizoram chuan hmasawnna a hmuh zel tur thu a sawi a. Mizoram cooperative society-te leh federation pawl hrang hrangte chu hemi kawngah hian an pawimawhzia a sawi bawk.

Minister chuan Sawrkarin policy tha tak tak duangchhuak mah se, mitin huap hmasawnna thlen tur chuan a bulthut(grassroot) atang hmalak a pawimawh tih sawiin, Cooperative society-te leh federation-te an thawh that a ngaih thu leh sawrkar policy thiltum thlentirtu pawimawh an ni tiin a sawi bawk. PM ASSHA hnuaia thlai thlan te- beliang mu, chhawhchi leh nihawi te chu mipuiin an chhawr a beisei thu sawiin, chumi tur chuan a hnathawktu te chu eng hmunah pawh, a hniam ber (primary level) atang a sang ber thlengin uluk taka thawk turin a chah a, mipui rawngbawlna thinlung tak tak pu chung zelin hmasawna kawngah ke pen zel turin kalkhawmte chu a fuih bawk a ni.

Khualzahawm pawhin thu sawiin, cooperative movement pawimawhna te, lo/huan neitu te thawhpui pawimawhna te leh cooperative society chu hmun kilkhawr leh thingtlangah te an pawimawh lehzual thu a sawi a. Cooperative Society-hi ram changkang leh ram hnufualah a pawimawh dan a inang reng a, Europe ram changkangah pawh Cooperative Society-in hmun pawimawh tak a changa, khawvela mihring tamna ber India-ah pawh hmun pawimawh a luah chho mek zel a ni a tih a sawi bawk.

Inkhawmnaah hian Documentary show en ho bakah lawmman hrang hrang Society credit leh non-credit a titha, Pigmy Collector titha, Business Correspondent titha leh Branch titha te hnenah lawmman semna hun neih niin, Pu Lalrinchhana, vice chairman chuan lawmthu sawiin hun a khar a ni.

Chawhnu lamah Assembly Rorel Inkhawm neih ani a. Hetiang hian thurel a ni.

1. Annual Report 2025-26 sawiho a pawm a ni.
2. Annual statement of Account 2025-26 sawiho a pawm a ni
3. Annual Profit 2025-26 sem dan sawiho a pawm a ni
4. Annual Target/Budget 2025-26 sawiho a pawm a ni
5. Bye-laws Amendment chungchang sawiho a pawm a ni.

MCAB ltd. hian kum 2025-26 chhungin Bank thar 5 leh ATM Booth 3 hawn belhin, tun dinhmunah hian Branch 35 neiin, ATM enkawl mek 44 an nei bawk a ni.