Ni 13.05.2026 khan Mizoram Cooperative Apex Bank te chuan Reserve Bank of India hnuaia Scheduled Bank an hmuh lawmna, Aijal Club-ah an nei a. Chief Minister Pu Lalduhoma chuan khuallian niin a telpui. Pu PC Vanlalruata, Cooperation Minister chu khualzahawm a ni.

Thusawiin Chief Minister chuan, Mizoram Cooperative Apex Bank-in RBI Scheduled Bank Status a hmuh vanga lawm ber zinga mi niin ka inhria a. Scheduled Bank Status pek a nih thu ka hriat rualin ka Social Media kaltlangin lawmpuina ka tichhuak a. Gazette a rawn chhuah khan lawmpuina ka rawn tichhuak leh a. Achievement thuhmuna tum hnih lawmpuina ka siam awm chhun a la ni hial awm e, a ti.

A thusawi dangte chu :

1. Apex Bank hi Mizo mipuite ta liau liau a ni a, a lo pian khan a thiltum lian ber chu Mizoram mipuiten eizawnna ngelnghet an neih theih nana hmalak a ni a. Vawiin thlengin chu rilru pu chung chuan a la kal a, a thlen chin apiangah mipuite pawhin kan chhawr tangkai a ni.

2. Tunah hian in CD Ratio hi 65.93 a ni a, Mizorama CD ratio tha ber a ni mekin ka hria a. ATM neih tam lamah pawh hian SBI dawttu in ni mek tih ka lo hria a. Mizo tawng ngata inziak ATM 45 in enkawl mek a ni.

3. Biak In sakna Loan Scheme, a bik taka duan in han nei te hi a lawmawm a. Ni tina sum leh pai dahkhawl duhte tana Pigmy Deposit Collector in han duang chhuak te hi – mi retheite tana ding in nihzia tilangtu a ni.

4. Apex bank hi India rama PACS leh M-PACS kalpui tha ber zinga mi in ni a. National Performance Award pawh a kum zawnin tum hnih lai in dawng tihte kan lo hria a.

5. Internet Banking lamah pawh Bank lian zawkte tih theih ang chu in ti ve thei deuh vek tawh a. Tunah chuan inter banking transfer-ah hma in sawn lehzual dawn a ni.

6. Thingtlang lamah inzar zau zel ula thain ka hria a. Thingtlang mipuite rin, an ban phaka inchhawp, Mizo tawnga dawr theih in nih chuan; in tan customer rinawm tak an ni zui ngeiin ka ring.

7. Kan sorkar ngaihpawimawh em em chu Credit – Deposit Ratio hi a ni. RBI chuan Bank-te chu an CD Ratio 60% tal ni turin a beisei a, benchmark a siam a. Sorkar pawhin he benchmark hi tlin vek turin kan beisei a ni.

8. Kan Bank tam takte hian thingtlang an thleng phak lo va, khawpuiah chuah branch an nei a. Heng inzarpharh tha lo bank-te hi CD ratio nei hniam an ni tlangpui lehnghal a. Anni hi kan tangkaipui meuh em tih hi kan inzawt fo a ni.

9. Kan sorkar hian kan Bank-te nena thawkho va, mi harsate khaichhuahna scheme – Hand Holding kan kalpui mek a. Kan Policy lian ber zinga mi a nih avangin kan Policy tihhlawhtlinna hmanraw pawimawh tak chu Bank te hi in ni, tih te a ni a.

RBI Scheduled Status chuan dinhmun sang zawkah a hlangkai ngeia a rin thu sawiin, an kal zelna turah duhsakna a hlan a ni.

Pu PC Vanlalruata, Minister pawhin thu a sawi a. MCAB in RBI scheduled status a hmu hi ka lawm hle a. A hminga Cooperation Minister ka nih laia lo thleng a ni a, vannei pawh ka inti hle. He dinhmuna MCAB a din theih chhan hi Bank thuneitute leh thawktute thawhrimna te, Cooperation Department hmalakna vang te a ni tih ka hria a. An zaa chungah lawmthu ka sawi a ni, a ti.

Mizoram Cooperative Apex Bank hi kum 1982 khan sum lu (share capital) cheng nuaih sawmparuk vel (Rs. 16.53 lakh) leh thawktu mi 16 ten nen bultan a ni a. Rambuai lai a nih avangin a tir lamah hian banking lama thiamna nei chhawr tur pawh an hmu lawk lo va ni. Tunah chuan MCAB hian branch 35, ATM 45 leh thawktu 248 leh vengtu 106 a nei tawh a. Tun Financial tawpah khan Deposit Rs. 1929.53 Crore leh Advances Rs. 1272. 11 Crore a nei a, Profit Rs. 40.39 Crore hmuin a CD ratio chu 65.93 a ni a. Mizoramah a sang ber a ni.

Reserve Bank of India chuan kumin March ni 12 khan Scheduled Bank atan a rawn pawm a ni.

MCAB RBI Scheduled Bank a nih lawmnaah hian Rev. Dr. K. Lallawmzuala chuan hunserh a hmang a. Pu Udit Prakash Rai, Commissioner, Cooperation Department, Pu T. Lhumding, General Manager, RBI, Mizoram leh Pu Bhaskar Manta, DGM, NABARD ten lawmpuina thu tawi an sawi bawk.