Vawiin Ni 31.07.2026 hi Apex din cham vawi 45-na a ni a. Hemi ni pual hian Branch zawngzawng-ah customerte tan eitur tuihnai tak chhawpchhuah a ni a. Hemi ni pual hian Branchte'n video clip siam inelna neih a ni bawk. A hnuaiah hian bank day puala CEO Message leh Bank Day puala thlalak hranghrangte tarlan a ni e.

Kan Bank Day vawi 45-na ah hian ka thawhpui zawng zawng te, kan Board of Directors leh shareholder te, thawktu chawl tawh te leh rinawm taka kan Bank min dawrtu zawng zawngte Bank Day chibai ka buk a che u.

A hmasa berin, kan Bank din tirh ni 31.07.1982 atanga tun hun thlenga Pathianin kan Bank min kaihhruaina hi a lawmawm takzet a ni.

Tun hnaiah hian kan Bank chuan hmasawnna pawimawh tak tak a nei a. A bik takin, Reserve Bank of India Second Scheduled-a ziah luh kan ni ta te hi kan Bank chanchina mel lung pawimawh tak a ni. Tin, Branch pawh kan in zar pharh zau deuh deuh zel a, Banking Correspondent (BC) hmangin hmun kil khawr leh hla zawkah banking service kan pe chho ta zel bawk a.Tun dinhmunah Branch 37 leh ATM 44 lai kan lo nei ta, hengte hian kan Bank in Banking Service tha zawk hmanga Mizo mipuite tihhmasawn kan tumna a tilang chiang hle.

Financial performance lama tehna hrang hrang – asset quality, deposit, loan leh business volume ah te pawh hma kan sawn chho zel a ni. Heng hlawhtlinna zawng zawngte hi mi pakhat emaw, department pakhat emaw hnathawh avanga lo thleng a ni lo a; thawktu zawng zawngte thahnemngaina, rinawmna leh thawhhona tha avanga lo awm thei a ni. Kan Bank tana theitawpa thawktute chungah lawmthu ka sawi a ni.

Kan hriat theuh angin Banking khawvel hi a inthlak chak em em a. Chuvangin, kan Bank hmasawnna atan leh Mizoram mipuite hnena service tha zawk pek zel theih nan, technology leh thiamna thar te kan zir a, kan hman thiam zel hi a pawimawh em em a ni. Chutihrualin, hmasawnna chu technology hmang chauha thleng thei a ni lo. Kan thawktu zawng zawng, a lian ber atanga a te ber thlengin customer service tha, professionalism, integrity leh accountability kan vawn nun reng a ngai a. Tin, internal control leh book-keeping dik leh tha te, NPA lut tur ven, hun vawn dik, taimakna leh rinawmna te hi kan Bank hmasawnna leh mipuite’n kan Banka rinna an nghah zel theih nan a pawimawh a ni tih hria in, tha thlah lovin tan I la zel ang u.

Sd/-
A. LALLUNGMUANA
Chief Executive Officer