Vawiin Ni 16.01.2026 khan Mizoram Cooperative Apex Bank Ltd. Branch 34-na, Saikhamakawn Branch chu Pu Udit Prakash Rai, Commissioner & Secretary, Cooperation Department chuan a hawng a. Hemi rual vek hian Pu John L.T. Sanga, Registrar, Cooperative Societies chuan Saikhamakawn ATM chu a hawng nghal bawk a ni. <br><br> Khuallian Pu Udit Prakash Rai, Commissioner & Secretary, Cooperation Department chuan Apex Bank chu North East-a Cooperative Bank tha ber zing ami a nih thu sawiin; mahse, chu chu Mizoram Cooperative Apex Bank chuan duhtawk mai lo va, India rama Cooperative Bank tha ber zinga tel thei tura tan la turin thawktute chu a fuih a. Apex Bank chu Commercial bank ni lova Cooperative bank a nih angin Bank hlawkna chauh thlir lova Mizoram mipuite tana ding a hmasawnna thlentu ni zel turin a fuih bawk a ni. <br><br> Pu John L.T. Sanga, Registrar, Cooperative Societies pawhin thusawiin, Mizoram hmasawnaah Cooperative Movement chu a pawimawh chho zel dawn a, chutah chuan Apex Bank chuan mawhphurhna lian tak a nei tih a sawi a. Saikhamakawn leh a chhehvela Bank awmchhun a nih dawn avangin mipuite tana malsawmna thlentu a nih ngei a beisei thu a sawi bawk. <br><br> Hawnna inkhawm hi MCAB Chairman, Pu Lalnunsanga’n kaihruaiin,, AMC Ward 19 Corporator Dr. C. Malsawmtluangi leh mi pawimawh dang ten thu an sawi bawk a. Pu A. Lallungmuana, Chief Executive Officer chuan lawmthu sawiin hun a khar a ni.