Vairengte, the 25th November, 2025: Vawiin khan Mizoram Cooperative Apex Bank Ltd. Chairman Pu Lalnunsanga chuan Vairengte-ah Mizoram Cooperative Apex Bank Branch 33-na, ‘Vairengte Branch’ a hawng. Branch hawnna inkhawm Vairengte Bazar Hall-a neih hi Pu Lalrinchhana, Vice Chairman-in a kaihruai a ni. Pu Lalnunsanga, Chairman, Mizoram Cooperative Apex Bank Ltd. chuan thu sawiin, Apex Bank chu Mizoram-in Bank a din awmchhun a nih thu leh, Mizo mipuite avangin nasa takin hma a sawn mek zel a ni, a ti. Bank hmasawnna kal zelah kum tin thawktu thar 30 bawr vel Recruitment an kalpui thin tih a tarlang a. Bank-in sum a kawl atanga Loan a pekchhuah tehfung, CD Ratio-ah pawh a sang ber an nih thu a sawi bawk. Chairman chuan Bank thar chu Vairengte leh a chhehvel khua mipuiten rinawm leh tangkai taka an hman a, hmasawnna thlentu pawimawh tak a nih ngei a rin thu a sawi. He hunah hian Pu H. Vanlalbiakzauva, MCS, SDO (C), Vairengte pawhin thu sawiin, Mizoram leh Assam state inrina hmun khaw pawimawh taka Mizoram Cooperative Bank Branch thar a lo awm ta chu lawmawm a tih thu a sawi a. Vairengte Bazar lung lai takah ATM nena Branch thar hawn a ni chu Vairengte leh a chhehvel mai bakah, thenawm state nena insumdawn tawnnaah awlsamna tam tak a thlen ngei a beisei thu a sawi a ni. SDO (C) chuan Mizo mipui Bank anih anga, neitu nihna thinlung pu a Bank hmang tangkai turin kalkhawm te a chah bawk. Pu P. Lalsawmliana, General Manager hnen atangin Report tawi ngaihthlak a ni a. Bank hawng tura tihtur leh phalna lak hmasak tur tam tak a awm thu te, IT Connectivity chungchanga harsatna hrang hrang a awm avanga Branch hawn a nih theih mai loh thu te a sawi a. Vairengte Branch hawnna atana senso tlangpui chu cheng nuai sawmhnih (Rs. 20 Lakhs) a nih thu a tarlang bawk a ni. Vawiin Apex Bank Vairengte Branch hawnna hunah hian Pu JD Traite, DDM NABARD leh mi pawimawh dang ten thu an sawi bawk a ni.